هذه مرثية الشاعر / دحيم بن ربيعان البشري في وفاة والده يوم الاثنين 3/1/1433هـ
الحمـــد للـوالي عـزيز الجـلالي اللـي خـلق ملكـه ورسـى الجبـالي
و قـدر لنا آجـال مـاشي محــالي والأجــل حيث تروح يالعبـد يلقـاك
أول خـبر جـاني سمـعـته ولـديت و أنا مـريـح في مكـاني و فـزيـت
وقلت ألا يلـيت يلـيت مـا حيـت و يالعبـد ما دامـت على حال دنيـاك
عـام ألف واربع مايه وثـلاثه وثلاثين في شهـر واحـد يوم ثـلاثه والاثنـين
حـل القـدر وحنا بالأقـدار راضين و يالله توفقنـا عـلى الصـبر ورضـاك
و يالله تجعـلنـا مـن الصـابرينـا وانـك عـلى بقعـا واهـلهـا تعينـا
بامـرك عسـانا للـرضا كـاسبينا ولا خـاب عبـدٍ فالشـدايـد ترجـاك
و يـارب مـالي غيـر دبرتك والي وانـك تلطـف بـي وتلطـف بحــالي
واني دخيـلك ياعـزيز الجــلالي في يومنـا المـوعـود نهــار نلقـاك
مرحـوم ياشيخـاً تقـافت لياليـه اللـي ليا عطـا علم يحمـا قـوافيـه
عـز البعيـد وعـز منهـوا مـواليه ويفـز يوم تقـوله العـلم يعــنـاك
أبودحيـم اللـي يزبـن دخيــله اللـي لـربعـه فالشــدايـد دليـله
حلحيل خصمـه فالحيـل مايحيـله ويصـادق أهـل الصدق ماهو بشكـاك
عـز اللـه انه فالقبيـله فقيــده راع المـواقف والعـلـوم الأكيـــده
هـذا كـلام الصدق والله شهيـده يا شيخنـا مرحـوم والخلـد مثــواك
المـوت شـال الأنبيـاء والصحابه ياكـم شبـابٍ مـا تـهنـى بشبـابـه
أقفـى بملبـوس الكـفن عن ثيابه في يـوم مـا تنفـع يـمينـك ليسـراك
والختـم باسـم اللـي منشي مخيله ومحمــد اللــي للخــلايق دليـلـه
شفيعنـا يـوم البصـايـر قليـله نـهـار مـا ينفعـك يالعبـد شكـواك