الألفيه للشاعر / سعد بن عبيدالله القصيري

الألف أولف مـن غريبات الأشعار =جمـلة بــيـوتٍ مــثل نـفـحات الأزهار

يـبـقـى لهـا بـيــن الـمـحـبـيـن تــذكــار =أحلى مــــن الشهـد المــصفى على الــريـق

البا بـديت بنصح والنصح مطلوب=بأجمل هديه من محبٍ لمحبـوب

وكلٍ عليه أغلاط وعيـوب و ذنوب=إلا الـنبــي ســيـــد جـــمــيـع الــمــخـالــيق

التا تراجع لا تمادى اليا اخطيت=قدام لا تكثر نعـوت الـنواعيت

وتحمد الله كل ما اصبحت و امـسـيت=يهديك للــطــاعـه و حـسـن الـــتـــوافــيـق

الثا ثبات العبـد في حفـظ ديـنه=والـثانيه عطـفـه على والديـنه

والثالـثه بـمـواصـله لأقـربـيـنه=وحـفــظ الأمانه و العهد والــــمـــواثـيـــق

الجيم جارك جارك الله من النار=اعرف حقوق الجار وسئل عن الجار

وادمح له الزلة اليا صـار ما صار =لا تـــــجـعـل ابـوابـــك بوجهـه مــغــالـيــق

الحا حلاة البـيض تـلعات الارقاب=اليا اجتمع مع حسنهن عقل و أداب

و تقيدن بـقيـود وحدود وحجـاب= مــــثـــل حـــــــــرارٍ قاضـبتهــا الـمسابـيـق

كم جابن الخفرات جيل بعد جيل=لولا العذارى كان مابه رجاجيل

وكم بينهن تطـلع شموع و قـناديـل= وهـــــن الـكـنـــوز بـمـغـلقات الــصـنــاديـق

شقرٍ مثل وصف الجواهـر تلالا=وســـمـــرٍ بـهـــن زود الــــحــلآ و الـدلالا

و صفرٍ وعـفـرٍ هـن ملوك الجمالا= نظراتهن تـســحر قـــلـوب الـعــشـاشــيــق

الخا الخوي خله من الناس الأخيار=مقيم ولا في طويلات الأسفار

ترى الوفا و الجود من طبع الأحـرار= خـــــويــهـــم ما يـشـكى الـهـم والــضـيـق

الدال دور حرةٍ بنت حره=تصبـر معك في حلو وقـتك ومره

مصـيونةٍ مـن حـاشها حاش دره =مــن مـــنـــسـبٍ مــــا يـــلـــحقنه ملاحـــيق

الذال ذا وقـتٍ وطي الصقر و الـذيب=والبـوم غـنى في طـوال المراقيب

و الكدش طمعت في حصان الاطـاليب= وتـــخـــالــطــت غــربانها و الـــغــــرانيق

الرا روايـه تخـتلـف عن روايه=وبـعض العـرب تـثـر عـليه الدعايه

ولا اللبـيـب يـكـون عـنـده درايه= ان كـان عــــلــــمٍ صــــح و ان كان تـلـفـيق

الزا الزيارة واجـبه بـين الاقراب=يفـتح بها باب ويـقفـل بهـا باب

لو إن بعض الناس لو طبت ما طـاب =لا بــــارك الله بالــرخــــوم الـــمــدانــيــق

السين سيفٍ سلته ترهـب اعـداك=اللى بصعبات المواقـف بيـمناك

لا تسـتـمع به قول هـذا وهــذاك =نـــقـــالـة الـــنـــمـــه وســاع الاشـــاديق

الشين شاور واستمع واقـبل الشـور=يـمكن يصيب الراي والحظ له دور

ما يكابـر الا كـل جاهـل ومـغــرور=يا ما هـــدم مـستــقـبلـه دون تــــبــريـــق

الصاد صاحب صاحـب الـعـقـل والدين=والأصدقا دايـم تراهم قـليلين

لاحـتجـتهم ما شـفـت واحد ولا اثـنين= ولـــقــيــــتـهم مـــثـل الـصـــور بالــمـعــالـيـق

الضاد ضـدونا العدا يا أمة الـضاد=من بعـد ما كـنا مـناره للأمجاد

ان ما توحـد صفـنا ضد الأضــداد= سـلــط عـــليــنا كــــل كـــــافــــر وزنــديـــق

الطا الطلايب والفـتن و المصايـب=لاجات بـيـن الأصـدقاء والقرايـب

تفرقوا من عـقـب ما هم حـبايــب =وأســــبابـهـــا غــــبر الوجــــيه المــــماحيـق

الظا الظنا هم قرة القلب والعين=وإن حصنوا بالدين والمذهب الزين

يطـلع شبابٍ طـلعـته تـقضي الدين =ويــــحـــقـق كـــبــــار الـــطــموحـات تحـقـيـق

العين عادات العرب تكرم الضيف=أهل الأدب والفكر والشعر والـسـيـف

واليوم بالله كيف نصبر على الحيف =ويـــن الـنـــشـاما والـــعـــيال الــمــطـــالــيــق

الغين غيـر الله ما احدٍ بباقي=وحنا عـلى الدنيا ضـيـوف و طراقي

وبالعلم نـرقى عاليات المراقي =ولا الــــجـــهــل ذلـــــه وقــــلـــه وتــفـــريــــق

الفا الفـتى فـكره متى ما تحـرر=يـمكن يجيك بـفكرةٍ ما تـكـرر

لكن من كثر القيـود يـتضـرر =كثــر الـــقـيـود تـــحــد وتــــلــد وتــــعــيـــق

القاف قـل المال يجعـلك تحـتاج=للديـن والمنه ووقـفات الأحراج

اسعي لرزقـك لو تحت زرق الأمواج =ولا عــلـى روس الــجــــبـال الـــشــواهيــق

الكاف كم شاركت بـسمي ورسمي=و اخذت من عرض اهـل العـرف قسمي

تلقى على الوضح المزايـين وسـمـي= اللي غـــلاهـــن حـــرق الـقـــلــب تـحـريـــق

اللام للحب الحقـيـقي علامه=بمـشـاهـدة وجه المحب وسلامه

في حظـرته في نظـرته في كلامه= نــشــوة غـلـى يـسـكـر بـهـا الـعـــقل ويــفـيـق

الميم ما مثل الــشجاعة و الأخلاق=اليا باعـوا الرفـقه قـلـيلين الأوفاق

اللي على الدنيا لهم هـوش و إخـناق= مـثل طـيور البـــغـــبــغــاء والبـــطـــــــاريـق

النون نجـد المجد لله دره=يا زيّن مرباعه وبـرده وحره

امـا القصـيم بنون عـيني مقره =أرض النخل و ارض الرجـــــال الـــعـــمــالـيق

الها الهوايه والهوى شانهم شان=غلى وولاء و ابـداع و امتاع واشجان

سحرٍ اليا سـيطـر على قلب الانسان= يــمـكن يـزهــــق بـعـض الأرواح تزهـيــق

الواو وش حال الرعـية بلا راع=صـيدة خلا يـطـمع بهـا كـل طـماع

والذيـب له هـده ورده اليا جـاع =في كــل يوم يـحـوف ويـشـوف ويــــويــق

اليا يـقـول ابــوفهـد يا سحايـب=هـلّي وعـلّي كل حاضـر و غايب

واروي كبود الأصدقا و القرايـب =وعـلى الــعــدا هــــــدمٍ وردمٍ و تــغـــريــق[/poem]

صح السان الشاعر ابوفهد وقصيده دايم جزل
وبيض الله وجهك ياخوي قصيري وأفتخر على
هذا لنقل الرائع