قصة البيت المشور-----------لاشفـت ظـول النـاس بالـك تعـسـه --- لاجـنـبـك شـــر المخـالـيـق خـلــه؟

السلام عليكم


اقدم لكم هذه القصه والقصيده


وهي تنسب لــ محمد بن مهلهل الشعلان


كان على محمد بن مهلهل الشعلان دم بسبب قتله لأحد ابناء عشيرته .. فجلا عن قومه ( أي رحل عن قومه بعيدا ً )
مده طويله من الزمن عند احدى القبائل المجاورة , ثم أن اهل القتيل سامحوه
ورضوا بالديه .. فعاد فرحا ً مشتاقا ً الى أهله بعد طول غياب ....

ويوم وصل لمشارف قبيلته شاف ظول
( الظول او الظلاله هم الجماعه من الناس ) عند مارد الما .
ويسمع اصواتهم عالية فتوجه لهم ..... يبي يشوف وش عندهم بدافع الفضول ؟

ويوم قرب لقى ناس متهاوشين ..!!
وهم يجونه اثنين منهم يركضون واحد يطرد الثاني؟

ويوم وصله الاول قاله : بوجهك تراني بوجهك يارجل!؟
وهو يصير ورى ابن مهلهل ويحتمي به؟
وجا الثاني معه سيف يبي يذبحه ..؟

قاله ابن مهلهل : دخيلي يارجل ... عين خير دخيلي؟
لكن هذاك جاي ذبــّــاح؟ وماطاع يبي يضرب دخيله من وراه!؟
وهو يسل ابن مهلهل سيفه وهو يقتله ..دفاعا ً عن دخيله..؟!
وهو يرجع مع اثره...!!
جلا عن ربعه وتغرب مره ثانيه!؟

وقال هالقصيده الجميلة اللي اخذت اصداء واسعه في وقتها الى الآن :


يـامـل قـلـب ٍ كـــل هـــم ٍ يـمـسـه --- مـســة حـبــال مـهــاوزات الأظـلــه
ولــي عـجـوزٍ كــل حـيــن ٍ تـعـسـه --- حـتـى سفـيـه الـعـرب جـايــز ٍ لـــه
طس السبيل من اشقر التتن طسّه --- الشـاوري يجلـي عـن القـلـب عـلـه
مــن كـيـس قــرمٍ دايــم ٍ مايـدسـه --- تلـقـاه مـقـروط ٍ عـلـى جــال دلـــه
لاشفـت ظـول النـاس بالـك تعـسـه --- لاجـنـبـك شـــر المخـالـيـق خـلــه؟
لـو عندنـا مـن غـيـب الايــام رســه --- الآدمـــي مـصـلـوح نـفـسـه يـدلــه
يالله يالـلـي كـــل صـــوتٍ تـحـسـه --- عقـد البلـش غيـر انـت مـحـدٍ يحـلـه
تـفـرج لـمـن مثـلـي زمـانـه يـرسـه --- عليـه مـن بـعـض المعـانـي ممـلـه
عليـه مـن بعـض المعانـي محسـه --- ساعـة خـرج مـن علـة ٍ جــاه عـلـه
البـوم يـفـرس والفـهـد صــار بـسـه --- تـبـدلــت دنــيــاك يـافــطــن ٍ لـــــه
سبـع الخـلا كيـف الضـوايـن تنـسـه --- والصلح مـن راع الغنـم ماحصـل لـه
القـبـس يــورد والظـوامـي تـلـســـه --- والمـزن عطشـان والـوطـى مايبـلـه
لاصـار عـن حقـك سـلاحـك تـدسـه --- ماينقعـد لـك فــي حـضـون المـذلـه